बेलायत, २ भदौ । रुसले युक्रेनद्वारा आफ्ना सैन्य तथा औद्योगिक लक्ष्यहरूमा गरिएका ड्रोन आक्रमणमा बेलायतमा निर्मित ड्रोन प्रयोग भएको पुष्टि भएपछि बेलायतलाई यसको ‘परिणाम भोग्नुपर्ने’ चेतावनी दिएको छ।
बेलायतस्थित रुसी दूतावासले जारी गरेको विज्ञप्तिमा बेलायतले ‘जानाजानी युक्रेन संकटलाई थप चर्काउने बाटो रोजेको’ आरोप लगाउँदै भनेको छ, ‘द्वन्द्वमा बेलायतको संलग्नता जति गहिरो हुँदै जान्छ, उसले त्यति नै ठूलो मूल्य चुकाउनुपर्नेछ।’
युक्रेनले पछिल्ला दिनहरूमा मस्कोसहित रूसका विभिन्न क्षेत्रहरूमा ड्रोन आक्रमण तीव्र बनाएको छ।
ती आक्रमणहरूमा तेल प्रशोधन केन्द्र, इन्धन डिपो, रसद केन्द्र तथा प्रमुख अनलाइन खुद्रा कम्पनी वाइल्डबेरीजका गोदामहरू लक्षित गरिएको बताइएको छ।
यसप्रति प्रतिक्रिया दिँदै बेलायती रक्षा मन्त्रालयका प्रवक्ताले बेलायत युक्रेनसँग ‘काँधमा काँध मिलाएर’ उभिएको स्पष्ट पारे।
उनले भने, ‘युक्रेन र बेलायत तथा हाम्रा सहयोगीहरूविरुद्ध भइरहेको रुसी आक्रमणको प्रतिरोधमा उभिने यो सरकारको दृढ संकल्पबारे रूसले कुनै शंका गर्नु हुँदैन।’
यसअघि पनि रुसले युक्रेनलाई बेलायतले ड्रोन प्रविधि तथा स्टर्म स्याडो क्रुज मिसाइल उपलब्ध गराएको विषयमा आलोचना गर्दै आएको थियो।
रुसी दूतावासले फेरि दोहोर्याउँदै भन्यो, ‘लन्डनका कार्यहरूले अनिवार्य रूपमा त्यस्ता परिणाम निम्त्याउनेछन् जसका लागि उसले जवाफ दिनुपर्नेछ।’ यद्यपि मस्कोले सम्भावित प्रतिक्रियाको स्वरूपबारे कुनै विवरण दिएको छैन।
युद्धको पछिल्लो चरणमा युक्रेनी ड्रोन आक्रमणहरूले रूसको घरेलु इन्धन आपूर्ति प्रणालीमा प्रत्यक्ष असर पारेको र रुसी अर्थतन्त्रलाई ठूलो धक्का दिएको बताइएको छ।
फेब्रुअरी २०२२ मा रूसले युक्रेनमाथि पूर्णस्तरीय आक्रमण सुरु गरेदेखि बेलायत युक्रेनका प्रमुख अन्तर्राष्ट्रिय समर्थकहरूमध्ये एक रहँदै आएको छ।
बेलायती रक्षा मन्त्रालयले ‘रुसी राष्ट्रपति भ्लादिमिर पुटिनको अवैध आक्रमणबाट आफूलाई जोगाउन युक्रेनलाई आवश्यक उपकरण उपलब्ध गराउन बेलायत प्रतिबद्ध रहेको’ जनाएको छ।
युक्रेनले पछिल्ला हप्ताहरूमा आफ्नै स्वदेशी ड्रोन तथा मिसाइल प्रविधिको प्रयोग पनि उल्लेखनीय रूपमा बढाएको छ। तीमध्ये ‘पी–६ फ्लेमिङ्गो’ क्रुज मिसाइल पनि समावेश रहेको बताइएको छ।
युक्रेनी सेनाले पछिल्ला दुई दिनमै मस्को क्षेत्रतर्फ सयौं ड्रोन प्रहार गरेको जनाएको छ। मस्को क्षेत्रका गभर्नर एन्ड्रे भोरोब्योभका अनुसार मंगलबार भएको आक्रमणमा १० वर्षीया एक बालिका घाइते भएकी छन् भने वाइल्डबेरीजको गोदाममा क्षति पुगेको छ।
यता युक्रेनमा रुसी आक्रमण निरन्तर जारी रहेको छ। पछिल्ला आक्रमणहरूमा कम्तीमा १७ जनाको मृत्यु भएको छ, जसमा उत्तर–पूर्वी युक्रेनको एक गाउँका १० जना नागरिक पनि समावेश छन्।
दुई बेलायती कम्पनीहरूले युक्रेनलाई आपूर्ति गरिएका ड्रोन उत्पादन गरेको पुष्टि भएको छ। हालैका आक्रमणहरूमा बेलायती ड्रोन प्रयोग गरिएको र जसबाट ३५ अर्ब पाउण्डभन्दा बढीको आर्थिक क्षति पुगेको दाबी गरिएको बीबीसीलाई एक सैन्य स्रोतले जनाएको छ।
रूसले फेब्रुअरी २०२२ मा पूर्णस्तरीय युद्ध सुरु गरेदेखि हालसम्म युक्रेनको करिब पाँचौं भाग भूभाग आफ्नो नियन्त्रणमा राखेको छ।
रुसी विदेश मन्त्रालयकी प्रवक्ता मारिया जाखारोभाले सन् २०२४ मै बेलायती कम्पोनेन्ट र कन्फिगरेसन प्रयोग गरिएका ड्रोनहरू रूसको रोस्तोभ क्षेत्रको कामेन्स्की जिल्लास्थित इन्धन डिपोमाथिको आक्रमणमा प्रयोग भएको आरोप लगाएकी थिइन्।
रुसमा युक्रेनी आक्रमणको पछिल्लो लहरपछि मस्कोले बेलायतलाई चेतावनी दिएको छ।
रातभर भएका पछिल्ला आक्रमणहरूमा रुसी अधिकारीहरूका अनुसार मस्को वरपरको क्षेत्रमा करिब ६२० वटा ड्रोन प्रहार गरिएका थिए। रुसी वायु प्रतिरक्षा प्रणालीले १८० भन्दा बढी ड्रोन खसालेको दाबी गरेको छ। यद्यपि धेरै व्यक्ति घाइते भएको अधिकारीहरूले बताएका छन्।
वाइल्डबेरीज कम्पनीले जारी गरेको विज्ञप्तिमा आक्रमणका कारण आफ्नो रसद परिसरमा ‘सानो क्षति’ पुगेको जनाएको छ।
रुसभित्र भएका यी आक्रमणहरू युक्रेनमाथि भइरहेको रुसी क्षेप्यास्त्र तथा ड्रोन आक्रमणको निरन्तरताकै बीच भएका हुन्।
उत्तर–पूर्वी युक्रेनको पेचेनिही क्षेत्रमा भएको सबैभन्दा घातक आक्रमणमा दुईवटा क्षेप्यास्त्र प्रहार हुँदा निजी घरहरू, एउटा क्याफे र हुलाक कार्यालयमा क्षति पुगेको छ भने १० गाउँलेको मृत्यु भएको छ।
अन्य स्थानहरूमा सुमी क्षेत्रमा तीन, जापोरिझियामा दुई र खेरसनमा दुई जनाको मृत्यु भएको छ।
पूर्वी अग्रपंक्तिनजिकको इजियम क्षेत्रमा पाँच जना घाइते भएका छन् भने राजधानी किभमाथि रातारात पाँच पटक आक्रमण गरिएको छ।
शनिबार राति युक्रेनले रूसतर्फ करिब ८२२ ड्रोन प्रहार गरेको थियो। तीमध्ये करिब ६०० ड्रोन मस्कोलाई लक्षित गरिएको मस्को क्षेत्रका गभर्नरले बताएका छन्।
उनले यसलाई ‘हालको स्मृतिमा मस्कोमाथिको सबैभन्दा ठूलो ड्रोन आक्रमणमध्ये एक’ भनेका छन्। उक्त आक्रमणमा रूसभर सात जनाको मृत्यु भएको रिपोर्ट गरिएको छ।
सोही रात युक्रेनमा भएको रुसी आक्रमणमा कम्तीमा सात जनाको मृत्यु भएको थियो भने ३९ भन्दा बढी व्यक्ति घाइते भएका थिए।
अप्रिलमा बेलायती रक्षा मन्त्रालयले युक्रेनलाई अहिलेसम्मकै सबैभन्दा ठूलो सहायता प्याकेजअन्तर्गत लामो दूरीसम्म प्रहार गर्न सक्ने प्रणालीसहित दशौं हजार ड्रोन आपूर्ति गर्ने घोषणा गरेको थियो।
प्रतिक्रिया
सम्बन्धित खवर
