टोकियो, १२ कात्तिक । अमेरिकी रक्षा मन्त्रालयका प्रमुख पिट हेगसेथले बुधबार जापान–अमेरिका गठबन्धनलाई ‘चिनियाँ सैन्य आक्रामकता रोक्नका लागि अत्यावश्यक’ रहेको बताउनुभएको छ ।

उहाँका जापानी समकक्षीले यसै अवसरमा जापानको रक्षा खर्च लक्ष्यलाई निर्धारित समयभन्दा अघि हासिल गर्ने योजनाको पुष्टि गर्नुभएको छ ।

हेगसेथको यो अभिव्यक्ति अमेरिकी राष्ट्रपति डोनाल्ड ट्रम्प र जापानकी नयाँ प्रधानमन्त्री साने ताकाइचीबीच मङ्गलबार टोकियोमा भएको पहिलो प्रत्यक्ष भेटपछि आएको हो । भेटमा सुरक्षा विषय प्रमुख एजेन्डा बनेको थियो ।

हाल जापान र चीनबीच सम्बन्ध चिसिँदै गएको अवस्थामा जापानले आफ्नो सैन्य स्थिति अझ बलियो बनाउने रणनीति अघि बढाइरहेको छ ।

हेगसेथले टोकियोमा जापानी रक्षामन्त्री सिन्जिरो कोइजुमीसँगको संयुक्त पत्रकार सम्मेलनमा भन्नुभयो, “क्षेत्रीय आकस्मिक अवस्थाको सामना गर्न र हाम्रो देशलाई सुरक्षित राख्न, जापानसँग काँधमा काँध मिलाएर हामी हाम्रो गठबन्धनलाई अझ सुदृढ बनाउन चाहन्छौँ ।”

प्रधानमन्त्री ताकाइचीले गत हप्तामात्र आफ्ना नागरिकहरूलाई सम्बोधन गर्दै यस आर्थिक वर्षमै रक्षा खर्चलाई कुल गार्हस्थ्य उत्पादन (जिडिपी)को दुई प्रतिशतमा पु¥याउने लक्ष्य हासिल गर्ने प्रतिवद्धता जनाउनुभएको थियो । यो प्रारम्भिक योजनाभन्दा दुई वर्ष अगाडि हो ।

संयुक्त राज्य अमेरिकाका करिब ६० हजार सैनिक हाल जापानमा तैनाथ छन् । अमेरिकाले टोकियोलाई अझ बढी रक्षा खर्च बढाउन प्रेरित गर्दै आएको छ, जसले हालै नाटो सदस्य राष्ट्रहरूले तय गरेको पाँच प्रतिशत जिडिपी रक्षा बजेट लक्ष्यसँग समानता देखाउँछ ।

रक्षामन्त्री कोइजुमीले बुधबार टोकियोमा भएको भेटमा आफ्नो देशले लक्ष्य छिट्टै प्राप्त गर्ने बताउनुभएको छ । उहाँले भन्नुभयो, “हामी यस आर्थिक वर्षमै जिडिपीको दुई प्रतिशतको लक्ष्य पुरा गर्न विशेष कदम चाल्नेछौँ ।”

कोइजुमीले भन्नुभयो, “जापान वरपरका क्षेत्रहरूमा मिसाइल क्षमताहरू उल्लेखनीय रूपमा वृद्धि भइरहेका छन् । त्यसैले, मिसाइल प्रतिरक्षा प्रणालीलाई निरन्तर सुदृढ गर्नु आजको आवश्यकता हो ।”

मङ्गलबार टोकियो नजिकै युएसएस जर्ज वासिङ्टन युद्धपोतमा आयोजित कार्यक्रममा राष्ट्रपति ट्रम्पसँगै उपस्थित हुँदै प्रधानमन्त्री ताकाइचीले सयौँ अमेरिकी र जापानी नाविकहरूसँग सम्बोधन गर्दै भन्नुभयो, “जापानले अहिले अभूतपूर्व सुरक्षा चुनौतीहरूको सामना गर्दैछ । हामी हाम्रो रक्षा क्षमतालाई मौलिक रूपमा सुदृढ पार्न प्रतिबद्ध छौँ ।”

जापान र अमेरिकाबीचको गठबन्धनलाई एसिया–प्रशान्त क्षेत्रमा सन्तुलन कायम गर्न महत्त्वपूर्ण मानिँदै आएको छ । पेन्टागनको ताजा अभिव्यक्तिले यो साझेदारी चीनको तीव्र सैन्य विस्तारका बीच अझ निर्णायक हुँदै गएको सङ्केत गरेको छ । एएफपी