बैतडी, २७ फागुन । नेपाली कांग्रेसका केन्द्रीय सहमहामन्त्री बद्री पाण्डेयले देशको आर्थिक समृद्धिका लागि कांग्रेसकै नेतृत्व आवश्यक पर्ने बताउनुभएको छ । उहाँले भन्नुभयो“विगतका कांग्रेसको नेतृत्वका सरकारले शिक्षा, स्वास्थ्य, पूर्वाधार विकास तथा आर्थिक समृद्धि क्षेत्रमा महत्वपूर्ण काम गरी जनताको जीवनस्तर माथि उकास्ने काम गरेको थियो । अगामी दिनमा पनि देश विकास लागि कांग्रेसको नेतृत्व आवश्यक छ । ”
बैतडीको शिवनाथ गाउँपालिकाको सुल्लेखानमा बिहीबार आयोजित आमसभालाई सम्बोधन गर्दै उहाँले कांग्रेस जननायक बिपी कोइरालाको प्रजातान्त्रिक समाजवादमा अगाडि बढेको छ भन्नुभयो । उहाँले भन्नुभयो, “ प्रथम जननिर्वाचित प्रधानमन्त्री बिपी कोइराला नेपालको प्रजातान्त्रिक समाजवादका व्याख्याता हुन्, सोही बाटोमा कांग्रेस हिँडिरहेको छ । हामी कसैको विरोध गर्दैनाँै ।”
उहाँले नेपालका कम्युनिष्ट गलत बाटोमा बरालिएका आरोप समेत लगाउनुभयो । सहमहामन्त्री पाण्डेयले उहाँले भन्नुभयो, “राष्ट्रियता नारा लगाएर मात्रै हुँदैन । देशका लागि केही गर्नुपर्छ । नीति, विचार र सिद्धान्त नै नभएकाले राष्ट्रियताको कुनै अर्थ हुँदैन । कम्युनिष्टले जनताका पक्षमा कहिले पनि काम गर्न सक्दैनन् । देश विकासका लागि कांग्रेस नै चाहिन्छ ।”
सहमहामन्त्री पाण्डेयले एमसिसीका विषयमा नेपाली कांग्रेस जहिले पनि प्रष्ट रहेको जनाउँदै एमसिसी अनुदान सहयोग भएकाले त्यसलाई संसद्बाट पारित गरेको स्पष्ट पार्नुभयो । उहाँले भन्नुभयो, “एमसिसी धनी देशले गरिब देशलाई अनुदान दिने कार्यक्रम हो, यो अनुदानले राष्ट्रको हितमै काम गर्छ ।”
एमसिसी कम्युनिष्ट पार्टीका नेता प्रधानमन्त्री भएकै बेलामा अगाडि बढेकाले अहिले उनीहरुले विरोध गरेको कुनै अर्थ नहुने उहाँले बताउनुभयो । नेपाली कांग्रेस बैतडीका सभापति चतुरबहादुर चन्दका अध्यक्षतामा सम्पन्न सो सभामा नेकपा (एमाले)बाट निर्वाचित शिवनाथ गाउँपालिकाकी उपाध्यक्ष कुस्मा चन्द, कार्यपालिका सदस्य राजेन्द्र दयाललगायत नेता तथा कार्यकर्ता कांग्रेसमा प्रवेश गर्नुभएको थियो
‘घरघरमा कांग्रेस, जनजनमा कांग्रेस’अभियान
नेपाली कांग्रेसले ‘घरघरमा कांग्रेस, जनजनमा कांग्रेस’ अभियान सञ्चालन गर्ने भएको छ । आगामी चुनावलाई सो अभियान सञ्चालन गर्ने तयारी भएको जिल्ला सभापति चतुरबहादुर चन्दले बताउनुभयो ।
जिल्लामा टोल समिति विस्तार अभियान जारी रहेको र अब घरघरमा पुग्ने अभियान सुरु हुनेछ । उहाँले भन्नुभयो, “हामीले पार्टीको जिल्ला कार्यसमितिको तेस्रो बैठकबाट घरघरमा जाऔँ, कांग्रेस जिताउ अभियान सञ्चालन गर्ने निर्णय गरेका हौँ । सोहीअनुसार पार्टीका नेता र कार्यकर्तासहित घरघरमा पुग्छौँ ।” यही फागुन २९ गतेदेखि एक महिनासम्म अभियान सञ्चालन गर्ने तयारी भएको जिल्ला सचिव प्रेमबहादुर चन्दले बताउनुभयो । पार्टीको सङ्गठन विस्तार र सुदृढीकरणका लागि अभियान सञ्चालन गर्ने तयारी भएको हो ।
पार्टीको सिद्धान्त, नीति र विचारलाई आममानिसमा पु¥याउनका लागि अभियान सञ्चालनको तयारी भएको बताइएको छ ।
आगामी निर्वाचनमा पार्टीलाई बहुमत दिलाउनका लागि प्रत्येक वडा, टोल र घरमा पुग्ने सभापति चन्दले बताउनुभयो । उक्त अभियानका लागि यज्ञराज जोशीलाई केन्द्रीय प्रतिनिधिको रुपमा खटाइएको छ ।
–––
