काठमाडौं, १५ असार । विश्व विजेता फ्रान्सलाई पेनाल्टी शुटआउटमा ५-४ गोलले हराउँदै स्विटजरल्यान्ड युरोकप २०२० को क्वाटरफाइनल पुगेको छ। यसअघि युरो कपको साविक विजेता पोर्चुगल पनि अन्तिम १६ बाटै बाहिरिसकेको छ।
जारी युरो कप २०२० अन्तर्गत सोमवार राती रोमानियाको राजधानी बुखारेस्टमा भएको अन्तिम १६ अन्तर्गतको खेलमा निर्धारित ९० मिनेटको समयसम्म दुवै टोलीले समान ३-३ गोल गर्दा खेल अतिरिक्त समयतर्फ धकेलिएको थियो। थपिएको ३० मिनेटमा पनि
दुबै टोलीबाट गोल हुन नसक्दा खेल पेनाल्टी शुटआउट तर्फ गएको हो।
निकै रोमान्चक प्रतिस्पर्धात्मक खेलमा पहिलो हाफको १५औं मिनेटमा स्विट्जरल्यान्डले अग्रता लिएको थियो। स्विस स्ट्राइकर सेफेरोभिचले उत्कृष्ट हेडर गोल गरे । पहिलो हाफमा गोल गर्न नसकेको फ्रान्सले दोस्रो हाफमा ३ गोल फर्कायो। फ्रान्सका करिम बेन्जेमाले दुई र पल पोग्बाले एक गोल गरे।
दोस्रो हाफमा दुई गोलले पछिपरेको स्थितिलाई उल्ट्याउदै स्वीजरल्याण्डले फ्रान्सलाई अन्तिम १६ बाटै बिदा गराएको छ ।स्वीट्जरल्यान्डका तर्फबाट दुईगोल ह्यारिस सेफेरोभिचले र मारियो गाभ्रानोबीचले ९० औँ मिनेटमा एकगोल गरेका थिए ।
पेनाल्टी शुटआउटमा स्विट्जरल्यान्डले आफ्नो ५ वटै पेनाल्टीलाई गोलमा परिणत गर्न सफल भयो। जवाफमा फ्रान्सले पनि आफ्नो शुरुवाती ४ पेनाल्टीलाई गोलमा परिणत गरेका थिए । किलियन एमबाप्पेको अन्तिम पेनाल्टीलाई स्विस गोलरक्षक यान सोमारले उत्कृष्ट बचाउ गरे। जसबाट विश्व विजेता फ्रान्सलाई घर फर्फर्काउन बाध्य बनायो । स्विट्जरल्यान्डले अब क्वार्टर फाइनलमा स्पेनसँग प्रतिस्पर्धा गर्नेछ।
त्यस्तै हिजो राती डेनमार्कको कोपनहेगनमा भएको प्रि–क्वार्टरफाइनलमा विश्वकपको उपविजेता क्रोएसियालाई अतिरिक्त समयमा ५–३ गोल अन्तरले पराजित गर्दै तीन पटकको युरोकप च्याम्पियन स्पेनले अन्तिम आठमा स्थान बनाएको छ ।
खेलमा स्पेनलाई जित दिलाउन पाब्लो सराबिया, सिजर अज्पिलिकुइटा, फेरान टोरेस, अल्भारो मोराटा र मिकेल ओयार्जाबलले एक एक गोल गरे ।क्रोएसियाका मिस्लाभ ओर्सिच र मारियो पासालिचले एक एक गोल गर्दा एक गोल आत्मघाती उपहार पाएको थियो ।
