काठमाण्डौं, ४ पुस । नेपाली कांग्रेसको भ्रातृ संस्था नेपाल विद्यार्थी संघले यही पुस ५ गतेबाट थप सदस्यता वितरण गर्ने भएको छ । संघले यस कार्यकोलागि एक सय १३ क्याम्पसमा केन्द्रीय प्रतिनिधिसमेत तोकेको छ।
संघका अध्यक्ष दुजाङ शेर्पाले १२ औं महाधिवेशनको प्रारम्भिक चरणका रूपमा सदस्यता वितरण गर्न क्याम्पसहरूमा केन्द्रीय प्रतिनिधि तोकेको बताउनु भएको छ ।
विगत लामो समयदेखि नेविसंघको महाधिवेशन हुन सकेको छैन। यो संस्था तदर्थवादमा चलिरहेको छ ।
अध्यक्ष शेर्पाको भनाई छ : राष्ट्रव्यापी सदस्यता वितरण तथा सुझाव संकलन कार्य पुस ५ गतेदेखि सुरू हुन्छ र चैतभित्रै नेविसंघको १२ औं महाधिवेशन पनि गरिन्छ ।
हाल नेविसंघमा ७१० जना केन्द्रीय सदस्य छन् । तिनै केन्द्रीय सदस्यहरूलाई नै क्याम्पसहरूमा पुगेर सदस्यता वितरण र सुझाव संकलन गर्ने जिम्मेवारीसहित केन्द्रीय प्रतिनिधि तोकिएको हो।
उता नेविसंघको अर्को पक्षले भने थप सदस्यता वितरणको लागि केन्द्रीय प्रतिनिधि तोक्ने अध्यक्ष शेर्पाको यो निर्णयको विरोध गरेको छ।
केन्द्रीय सदस्य प्रेमिका रानामगरले एक वक्तव्य जारी गर्दै अध्यक्ष शेर्पाको यो निर्णय नेविसंघको विधान प्रतिकूल भएको भन्दै १२ औं महाधिवेशन हुन नदिने षड्यन्त्र गर्न लागिएकोले त्यसप्रति सचेत र सजग रहन आग्रह गर्नुभएको छ ।
उहाँले १२ औं महाधिवेशन गर्न छिट्टै केन्द्रीय प्रतिनिधि तोकिने र त्यही अनुसार नेविसंघका कार्यहरू अघि बढ्ने बताउनु भएको छ ।
