काठमाण्डौं, २६ चैत । स्वास्थ्य तथा जनसङ्ख्या मन्त्रालयले कोरोना भाइरसको सङ्क्रमण बढिरहेकाले कोरोना यसविरुद्धको खोप लगाउन सर्बसाधारण सबैमा आग्रह गरेको छ । यो आग्रह मन्त्रालयका सहप्रवक्ता डा समिरकुमार अधिकारी आज गर्नुभएको हो ।
सहप्रवक्ता डा समिरकुमार अधिकारीका अनुसार सङ्क्रमण बढिरहेकोले खोपको पहिलो मात्रा, दोस्रो मात्रा र बुस्टर डोज लगाउनु नै यसबाट बच्ने उत्तम विकल्प हो ।
मन्त्रालयले सार्वजनिक गरेको विवरण अनुसार कोरोना सङ्क्रमण हाल दैनिक रुपमा बढिरहेको छ । कोरोना भाइरसको सङ्क्रमण विगतमा शून्यमा झरेको थियो ।
हिजो मात्र ६४ जनामा नयाँ सङ्क्रमित फेला परेका थिए भने हाल कुल सक्रिय सक्रमितको सङ्ख्या ३५६ जना पुगेका छन् ।
काठमाडौँ उपत्यकामा मात्र हिजोसम्ममा १५ जना आइसोलेशन, आठ जना सघन उपचार कक्ष (आइसियु) र पाँच जना भेन्टिलेटरमा उपचार गरारहेका छन् ।
अहिले काठमाडाैँसहित उपत्यकाका ठूला अस्पतालमा कोरोना भाइरस विरुद्धको बुस्टर डोज लगाइँदै छ । स्वास्थ्य कार्यालय काठमाडौँका सूचना अधिकारी अञ्जना खड्काका अनुसार वीर अस्पताल, त्रिवि शिक्षण अस्पताल, शुक्रराज ट्रपिकल तथा सरुवा रोग अस्पताल, निजामति कर्मचारी अस्पताल, सशस्त्र प्रहरी बल अस्पताल, नेपाल प्रहरी अस्पतालबाट बुस्टर डोज खोप प्रदान गर्दै आइरहेको छ ।
यस्तै काठमाडौँका स्थानीय तहले पनि आवश्कता अनुसार विभिन्न ठाउँमा खोप प्रदान गरिरहेका छन् ।
केही दिनअघि गरिएको अनुवांशिक अध्ययानमा नेपालमा पहिलो पटक कोरोना भाइरसको नयाँ भेरियन्ट ओमिक्रोन एक्सविवि. १.१६ देखा परेको छ । मन्त्रालयले सङ्क्रमणको लक्षण देखिने वित्तिकै परीक्षण गराउन र आइसोलेशनमा बस्न अनुरोधसमेत गरेको छ ।
