काठमाण्डौ, १४ असार । साविक विजेता पोर्चुगललाई १–० ले हराउँदै युरोकप २०२० को खेलमा बेल्जियम क्वाटरफाइनलमा प्रवेश गरेको छ । सोमबार बिहान भएको खेलमा पोर्चुगल प्रि -क्वाटरफाइनलबाटै बाहिरिएको छ। बेल्जियमले अन्तिम ८ मा स्थान बनाएको छ ।
बेल्जियमको जितमा थोर्गन हाजार्डको एक मात्र गोल नै निर्णायक बन्यो । खेलको ४२औं मिनेटमा थोमस मुनिएरको पासमा थोर्गन हजार्डले डी बक्स बाहिरबाट उत्कृष्ट गोल गरेका थिए ।थोर्गन बेल्जियमका कप्तान इडेन हाजार्डका भाई हुन्।
फिफा वरियतामा हाल पहिलो नम्बरमा रहेको बेल्जियमले उत्कृष्ट प्रदर्शन गर्दै रोनाल्डोको नेतृत्वमा रहेको पोर्चुगललाई निरिह बनायो । समूहचरणमा पांच गोल गरेका रोनाल्डो बेल्जियमलाई भने गोल गर्न सकेनन ।
बेल्जियमले क्वाटरफाइनलको प्रतिस्पर्धीका रुपमा इटालीलाई पाएको छ । अष्ट्रियालाई अतिरिक्त समय मा २–१ ले हराउँदै इटाली क्वाटरफाइनल पुगेको हो ।
त्यस्तै हिजो राती भएको अर्को प्रि -क्वाटरफाइनल खेलमा युरोकपको समूह चरणमा तीनवटै खेल जितेर आफुलाई दाबेदारका रुपमा उभ्याएको नेदरल्यान्ड चेक गणतन्त्रसँग २–० ले पराजित भयो ।
पहिलो हाफ गोल रहित बरावरीमा समाप्त भएको थियो । तर ५५ औं मिनेटमा माथिईज डि लिग्टले रातो कार्ड खाएसँगै नेदरल्यान्ड्स निरिह बन्यो । १० खेलाडीमा सीमित भएको नेदरल्यान्ड्स विरुद्ध चेकले ६८ मिनेटमा खेलमा अग्रता लियो । चेकका टोमश होल्सले गोल गर्दै चेकलाई अग्रता दिलाए ।खेलको ८०औं मिनेटमा चेकले दोस्रो गोल गर्दै आफ्नो जीत सुनिश्चित गर्यो । चेकका लागि स्टार खेलाडी प्याट्रिक शिकले होल्सले दिएको पासमा दोस्रो गोल गरे ।
