वासिङ्टन, १२ वैशाख । रुसका विदेशमन्त्री सर्गेई लाभरोभले बिहीबार मस्को युक्रेनमा युद्धबारे सम्झौता गर्न तयार रहेको बताउनुभएको छ ।
महिनौँसम्म किएभमाथि भएको सबैभन्दा घातक आक्रमणपछि एक दुर्लभ आलोचना गर्दै अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनलाई आक्रमण रोक्न आग्रह गर्नुभएपछि रुसी विदेशमन्त्रीको यस्तो भनाइ आएको हो ।
“हामी सम्झौतामा पुग्न तयार छौँ, तर अझै केही विशिष्ट विन्दुहरू छन् जसलाई राम्रोसँग सुधार गर्न आवश्यक छ र हामी यसमा व्यस्त छौँ”, लाभरोभले सिबिएस न्युजसँगको अन्तर्वार्तामा भन्नुभयो ।
ट्रम्पका दूत स्टिभ विटकफ शुक्रबार रुस जाँदैहुनुहुन्छ । त्यहाँ उहाँले पुटिनसँग युद्धविराम वार्ताको अर्को चरण गर्ने अपेक्षा गरिएको छ ।
लाभरोभले वार्ता प्रक्रिया सही दिशामा अघि बढिरहेको र वासिङ्टनसँग वार्ता जारी रहने बताउनुभयो ।
उहाँले अमेरिकी राष्ट्रपति ‘सम्भवतः पृथ्वीमा एक मात्र नेता हुनुहुन्छ जसले यस परिस्थितिको मूल कारणहरूलाई सम्बोधन गर्नुपर्ने आवश्यकता स्वीकार गर्नुभयो’ तर ट्रम्पले ‘सम्झौताका तत्वहरू उल्लेख गर्नुभएन’ भन्नुभयो ।
तर बिहीबार बिहान युक्रेनको राजधानीमा क्षेप्यास्त्र र ड्रोन हमलामा कम्तीमा १२ जनाको मृत्यु भएपछि ट्रम्पले रुसी राष्ट्रपति पुटिनलाई प्रत्यक्ष अपिल गर्नुभयो ।
रक्तपातको द्रुत अन्त्यका लागि ट्रम्पको दबाबलाई बेवास्ता गर्दै दर्जनौँ सर्वसाधारणको ज्यान लिएको रुसी हवाई आक्रमणको लहरमा यो पछिल्लो थियो ।
“रुसी आक्रमणबाट म खुसी छैन”, सामाजिक सञ्जालमा ट्रम्पले भन्नुभयो, “आवश्यक छैन र धेरै खराब समय । भ्लादिमिर, रोक्नुहोस १”
रुसको पक्षमा रहेको आरोप लगाइएका र युक्रेनी राष्ट्रपति भोलोदिमर जेलेन्स्कीलाई बारम्बार निन्दा गरेका ट्रम्पलाई पत्रकारहरूले युद्धको अन्त्यका लागि वार्तामा मस्कोले के के छुट दिएको थियो भनेर सोधेका थिए ।
“सम्पूर्ण देश लिन रोक्नु–– धेरै ठूलो छुट”, उहाँले जवाफ दिनुभयो ।
रुसले केही दिनमा देश कब्जा गर्ने आशामा सन् २०२२ मा युक्रेनमा आफ्नो पूर्ण–स्तरको आक्रमण सुरु गरेको थियो, तर त्यसयता एक रक्तरञ्जित युद्धमा फसेको छ जसमा दुवै पक्षबाट ठूलो क्षति भएको छ ।
– क्रिमिया विवाद –
जेलेन्स्कीले पछिल्लो आक्रमणहरूको परिणामसँग व्यवहार गर्न दक्षिण अफ्रिकाको यात्रा छोट्याउनुभयो ।
उहाँले किएभका सहयोगीहरूले पुटिनलाई पूर्ण र बिना शर्त युद्धविराममा सहमत हुन बाध्य पार्न पर्याप्त गरिरहेका छन् कि भनेर प्रश्न गर्नुभयो ।
“म रुसमाथि कुनै कडा दबाब वा रुसको आक्रामकता विरुद्धको कुनै नयाँ प्रतिबन्ध प्याकेजहरू देख्दिनँ”, यदि मस्को लडाइँ रोक्न सहमत भएन भने ट्रम्पले पहिले नै परिणामहरूको चेतावनी दिनुभएको उजागर गर्दै जेलेन्स्कीले भन्नुभयो ।
बुधबार ट्रम्पले जेलेन्स्कीलाई क्रिमियामाथि रुसको दाबीलाई मान्यता दिन अस्वीकार गरेर शान्ति प्रयासलाई निराश पारेको आरोप लगाउनुभएको थियो । क्रिमिया क्षेत्रलाई अमेरिकी राष्ट्रपतिले ‘वर्षौंअघि हराएको’ बताउनुभएको थियो । मस्कोले सन् २०१४ मा क्रिमिया प्रायद्वीपलाई आफ्नो कब्जामा लिएको थियो ।
“हाम्रा साझेदारहरूले प्रस्ताव गरेका सबै कुरा हामी गर्छौंस हाम्रो कानून र संविधानको विपरीत मात्र हामी गर्न सक्दैनौँ”, क्रिमियाको बारेमा सोधिएको प्रश्नको जवाफमा जेलेन्स्कीले भन्नुभयो ।
यसको विपरित नाटोका महासचिव मार्क रुटले बिहीबार ट्रम्पलाई भेटेपछि ह्वाइट हाउसमा पत्रकारहरूलाई भन्नुभयो, “यो मस्को हो, किएभ होइन, जुन वार्तामा अगाडि बढ्न आवश्यक छ । बलहरू स्पष्ट रूपमा रूसी कोर्टमा छन् ।”
