काठमाडौँ, २७ भदौः एसियाली खेलकुद पत्रकार महासङ्घ (एआइपिएस) एसियासँग होटल एशोसिएसन अफ नेपाल (हान) र सिएमआर नेपालबीच सहकार्य गर्ने सम्झौता भएको छ ।
नेपाल खेलकुद पत्रकार मञ्च (एनएसजेएफ) को आयोजनामा नेपालमा पहिलो पटक आयोजना भएको एआइपिएस एसियाको २५औँ कंग्रेसका अवसरमा हानका अध्यक्ष विनायक शाह र एआइपिएस एसियाका अध्यक्ष ही दोङ जङबीच सम्झौतापत्रमा हस्ताक्षर भएको हो । उक्त सम्झौताअनुरूप एआइपिएस एसियाका एक हजारभन्दा बढी सदस्य पत्रकारले नेपाल आउँदा होटल सुविधामा १० प्रतिशत छुट प्राप्त गर्नेछन् ।
यसै अवसरमा हानले एआइपिएस एसियाका अध्यक्ष दोङलाई नेपालको सद्भावना दूतका रूपमा पनि नियुक्त गर्नुभएको छ । एआइपिएस एसिया र सिएमआर नेपालबीच खेल पत्रकार प्रशिक्षणका लागि पनि सम्झौता भएको छ ।
एआइपिएस एसिया अध्यक्ष दोङ र सिएमआर नेपालका निर्देशक उज्ज्वल आचार्यबीच सम्झौता भएको हो । सम्झौताअनुसार सिएआर नेपालले एआइपिएस एसियालाई हरेक सेसनमा दुई वटा खेल पत्रकार प्रशिक्षण कोटा प्रदान गर्ने भएको हो । त्यस्तै नेपाल खेलकुद पत्रकार मञ्च (एनएसजेएफ) को आंशिक छात्रवृत्तिमा एआइपिएस एसियाले उक्त प्रशिक्षण कोटा प्राप्त गर्नेछ ।
युवा तथा खेलकुदमन्त्री तेजुलाल चौधरीले खेलकुद पत्रकाहरूको छाता संगठन एआइपिएस एसियाको २५औँ कंग्रेसको एक समारोहबीच आज उद्घाटन गर्नुभएको थियो । उहाँले नेपालमा यस किसिमको आयोजना सम्पन्न हुनु ऐतिहासिक रहेको र यस किसिमका कार्यक्रमले निरन्तरता पाउनुपर्ने बताउनुभयो ।
त्यस्तै राष्ट्रिय खेलकुद परिषद् (राखेप) का सदस्य सचिव टङ्कलाल घिसिङले काठमाडौँमा एआइपिएस एसियाको २५औँ कंग्रेस आयोजना गर्न पाउँदा विशेष खुसी मिलेको र यो डिजिटल युगमा खेलकुद पत्रकारिताको विकसित परिदृश्यबारे छलफल गर्न ३० देशका खेलकुद पत्रकारहरू भेला हुनु प्रेरणादायी रहेको उल्लेख गर्नुभयो ।
एआइपिएस एसियाका अध्यक्ष ही दोङ जङले विश्व खेलकुदमा एसियाले नेतृत्व गरिरहेको र त्यसको उदाहरण पछिल्ला ओलम्पिकमा एसियाली राष्ट्रले पाएको सफलताले स्पष्ट पारेको बताउनुभयो ।
उक्त कंग्रेसमा नेपालका लागि पेरिस पारालिम्पिकमा ऐतिहासिक कास्यपदक विजेता पलेशा गोवर्धन, पत्रकार शिवानी थापा, भारत र चीनकी महिला पत्रकार र इस्पोर्ट्सकी एसिया प्रतिनिधिबीच महिला सशक्तीकरणबारे छलफल भएको थियो ।
त्यसैगरी नेपाल पर्यटन बोर्डले नेपालका विश्वसम्पदा सूचीमा रहेका ऐतिहासिकस्थल, पर्यटकीय क्षेत्र, भाषा संस्कृति, हिमालपहाड र देशको भौगोलिक अवस्थाका बारेमा वृत्तचित्र प्रस्तुत गरेको थियो । खेलकुद पत्रकारको छाता सङ्गठन एआइपिएसको एसियाली क्षेत्रको कंग्रेसजस्ता ठूलो आयोजना पहिलोपल्ट नेपालमा भएको हो । उक्त कंग्रेसमा विभिन्न ३० राष्ट्रका खेलकुद पत्रकारहरू सहभागी छन् ।
—
