काठमाण्डौं, २३ पुस । नेपाली कांग्रेसले राष्ट्रियसभा सदस्य निर्वाचनका लागि आफ्ना उम्मेदवारको नाम छनोट गरेको छ । उम्मेदवारको छनोट केन्द्रीय कार्यालय सानेपामा हिजो राति अवेरसम्म बसेको काँग्रेस पदाधिकारीको बैठकले गरेको हो ।
राष्ट्रियसभा निर्वाचनको लागि आज सोमबार उम्मेदवारहरूले नामांकन दर्ता गरिसक्नु पर्ने निर्वाचन आयोगको कार्यतालिका छ ।
काँग्रेसले छानेका उम्मेदवारहरूमा कोशीमा कृष्णप्रसाद सिटौला, मधेशमा आनन्दप्रसाद ढुंगाना ,वाग्मतीमा जीतजंग बस्नेत र विष्णुदेवी पुडासैनी रहेका छन् ।
त्यस्तै, गण्डकी प्रदेशमा किरणबाबु श्रेष्ठ र पदमबहादुर परियार अनि लुम्बिनी प्रदेशमा विष्णुकुमारी सापकोटा काँग्रेसको उम्मेदवार हुने भएका छन् भने कर्णालीमा कृष्णबहादुर रोकाया, सुदूरपश्चिममा बलदेव बोहरा र नारायणदत्त भट्टले टिकट पाएका छन् ।
पार्टीको यो निर्णयमा काँग्रेसका महामन्त्री गगनकुमार थापाले विमति जनाउनुभएको छ । “केन्द्रीय कार्यसमितिले गरेको निर्णयभन्दा फरक मापदण्डबाट उम्मेदवार चयन गरिएको” भन्दै उहाँले लिखित विमति दर्ज गर्नुभएको छ ।
काग्रेसले सत्ता गठबन्धनको भागबण्डामा १० सिट पाएको छ । त्यसमा शेखर समूहले ४ सिटको भाग पाएको छ ।
